 |
| Obra Luta kontra kolonialista husi Dom. Boa Ventura ami bolu hikas ó nia espìritu |
Kontinua riska edukasaun populár iha fatin ne'ebé ita hakat no kualker fatin ne'ebé ita rejiste ba. Esperitu voluntariu konsensializa umanu/a hotu iha otas nurak ba luta ida, luta ida ne'ebé sem obirigasaun bazeia ba vontade populár no konsiensia ema hotu nia hodi hateke ba realidade meik no kro'at (povu sei ki'ak no povo sei terus) ne'ebé bobar hela povo no rai sagradu Timor.
Iha era libertasaun povo, realidade meik no kro'at la mai husi seluk no le'et ida, husi rasik heroi libertasaun pátria ne'ebé dadaun ka'er hela ukun/podér, objetivu libertasaun povo taka metin hanesan hena kurtina ne'ebé hateke la hetan ka hanesan realidade bosok ida. Nune'e mosu makhusu ida ba ami, tanba-sá heroi libertasaun pátria kria fila fali meik no kro'at (povu sei ki'ak no povo sei terus) iha era libertasaun povu? Maske ibun to'os atu hatete imi traisaun ba prinsípiu luta libertasaun povu, maibé imi mak hari'i, habelar no haklaken luta ba ami jerasaun foun no ami kontinua obra luta ni'an husi imi.
Ita nia inimigu loloos mak sira ne'ebé supa no esplora povo nia riku soin ba interese individuál no grupo partidária iha sistema demokrasia. Sistema demokrasia halo ema barak haluha an, maske ema matenek barak no heroi libertasaun pátria sira hakarak buka liu oportunidade atu ukun eh ka'er podér hodi kompete iha demokrasia hodi hatudu forsa polítika ba malu to'o haluha tiha povu ne'ebé sei ki'ak no povu ne'ebé sei terus.
Husi ida ne'e ami bolu fila asuwain/heroi sira ne'ebé sei moris, imi haluha ka imi finjidu ho prinsípiu luta uluk ni'an "mate ka moris ukun rasik-an, nakfila ba objetivu rua libertasaun pátria no libertasaun povo" Maibé ida ne'e mehis no naben ona iha imi nia fuan no kakutak. Ami bolu fila imi atu hanoin hikas no hateke ba kotuk ho prinsípiu luta no objetivu luta iha tempu kolonializasaun hodi lori fila hikas mai iha luta libertasaun povo no labele trai obora luta nian tanba asuwain/heroi balu mate ona no balu sei moris.
Libertasaun povo mak presiza luta tan ami prontu kontinua obra ne'ebé imi hari'i, habelar no haklaken husi imi ba ami maske dadaun ne'e meik no kro'at ne'ebé husik hela husi imi no kria rasik husi imi.
Bolu fila imi hateke ba kotuk.
Bolu fila imi hanoin hikas.
Bolu fila imi atu kontinua obra uluk ni'an.
Espíritu luta kontra ran kolonialista no imperialista suli hamotuk ona ho imi horiuluk kedas nodi lakohi fó ulun ba esplorasaun, intimidasaun no torturasaun ba povo, makhusuk dalan ida tan ba imi tanba-sá imi rasik hakarak halo terus povo? Resposta badak; imi la iha fuan, imi la iha ne'on no imi haluha an iha era indepedénsia.
Manapa, Cailaco 05/07/2021
